GNFC
სიახლე

დავით ფირცხალავას ფილმი ლოკარნოს კინოფესტივალის საკონკურსო პროგრამაში უკვე მეორედ მოხვდა - 26 07 2018
Slider Image

სულ რამდენიმე დღეში შვეიცარიაში ლოკარნოს საერთაშორისო კინოფესტივალი საზეიმოდ გაიხსნება, სადაც ახალგაზრდა ქართველი რეჟისორის - დავით ფირცხალავას ფილმის მსოფლიო პრემიერა უკვე მეორედ გაიმართება.

დავით ფირცხალავა ლოკარნოს კინოფესტივალზე პირველად 2015 წელს წარსდგა მისი სადებიუტო ნამუშევრით "მამა". ფილმი სექციაში Pardi di domani იყო ნაჩვენები და ფესტივალის ჯილდო "ოქროს ლეოპარდი" მოიპოვა.

3 წლის შემდეგ, დავით ფირცხალავა ლოკარნოში ახალი მოკლემეტრაჟიანი ფილმით "საშლელი" ბრუნდება, რომელიც ადრინდელის მსგავსად, კვლავ საკონკურსო სექციაში Pardi di domani იქნება წარმოდგენილი.

აღსანიშნავია, რომ Locarno Filmmakers Academy-მ სხვადასხვა ქვეყნიდან 19 ახალგაზრდა, წარმატებული რეჟისორი მიიწვია ლოკარნოს კინოფესტივალის ფარგლებში სხვადასხვა შეხვედრაზე და ღონისძიებაზე დასასწრებად.
რჩეულ რეჟისორებს შორის მოხვდა მარიამ ხაჭვანი. მარიამი ლოკარნოში მის ახალ პროექტს "ნენე" წარმოადგენს. 3 აგვისტოს კი ACADEMY SCREENINGS მისი მოკლემეტრაჟიანი ფილმის "დონოლა" ჩვენებას უმასპინძლებს.

ლოკარნოში გაემგზავრება კიდევ ერთი ქართველი რეჟისორი გიორგი ვარსიმაშვილი. იგი დოკუმენტური ფილმის პროექტით "სიმართლისა და დღესასწაულის თეატრი" პროგრამაში Doc Summer School მიიღებს მონაწილეობას .

ლოკარნოს კინოფესტივალი შვეიცარიის ქალაქ ლოკარნოში 1946 წლიდან იმართება და ცნობილია როგორც აღმოჩენების ფესტივალი, რადგან მრავალი კინორეჟისორის თუ მსახიობის წარმატებული კარიერა სწორედ ლოკარნოში დაიწყო.

წელს ფესტივალი 1-11 აგვისტოს გაიმართება.
პროგრამის სრულად სანახავად, ეწვიეთ შემდეგ ბმულს - https://www.locarnofestival.ch/pardo/program/home.html

Facebook Share
უკან